كيكة الكوكوط / تطبيق : أسماء التمالح

المقادير:

4 بيضات

كاس د الزيت

كاس د السكر

نص كاس د الماء بارد عادي

2 ساشيات د الكاكاو المر أو جوج معالق كبار

قبصة ملح

2 كيسان د الطحين فورص نوع جيد

2 خميرات د الحلوى

الطريقة:

كنعملو المقادير ف مولينكس: البيض، السكر، الزيت، الماء، قبصة الملح، الكاكاو المر، الطحين ونخدمو الآلة، نوقفو ونزيدو الخميرات، نشغلو الآلة من جديد حتى يتجانس الخليط كلو مع بعض.

ناخدو كوكوط، ندهنوها بشوية د الزيت والدقيق، ندهنوها ونرشوها مزيان، نكبو فيها الخليط د الكيك اللي حضرنا، نغلقو الكوكوط. نعملو المقلاة الثقيلة أو أي اناء يمكن يكون حاجز بين العافية والكوكوط، نشعلو العافية مهييييلة، ونردو الكيك ف الكوكوط يطيب، نخليواه مدة 45 دقيقة وكيف قلت العافية مهيلة، وبلا ما نعملو الصفارة ن الكوكوط.

مي كتطيب الكيك كيبقى يخرج واحد البخار من مكان الصفارة، وكتشم الريحة د الكيكة، طفي العافية وخودي موس او فورشيط تكي بيه الكيكة باش تتأكدي أنها طابت.

من بعد، خودي نص كاس عملي فيه شوية د نيسكافي حبوب، دوبيها، وسقي بيها الكيك. التزيين حسب اختيارك، زينيها باللي بغيتي، أنا هنا دهنتا بدانيت، وعملتلا شريطات بفورشيط. ممكن تزيميها بسكر كلاصي من فوق، أو بشكلاط مذوب او باللي بغيتي.

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *