المكونات :
250 غرام ديال اللوبيا اليابسة ( رابعة ) تكون مفزكة ليلة كاملة ومغسولة مزيان.
بصلة وحدة متوسطة محكوكة رقيق.
3 حتى لـ 4 دبال الفصوص ديال الثومة محكوكين رقيق.
2 معالق كبار ديال القزبور والمعدنوس مقطعين رقيق.
1 مطيشة متوسطة محكوكة بلا زريعة.
نصف معلقة صغيرة ديال مطيشة د الحك.
ربع حامضة مصيرة مغسولة من الملح ومحيدالا الزريعة.
التوابل أو العطرية :
معلقة كبيرة من التحميرة عامرة.
معلقة صغيرة (ونص معلقة صغيرة نخليوها حتى الأخير).
معلقة صغيرة عامرة من القزبور اليابس مطحون.
معلقة صغيرة من الخرقوم البلدي (الكركم) .
نصف معلقة صغيرة من سكنجبير (الزنجبيل).
شوية فقط ديال الملح حيت الحامض مصير مالح وما نديروهاشي في الأول.
3 معالق كبار ديال زيت الزيتون أو زيت عادية أو خليط بين زيت العود والزيت نالباتية.
ورقة واحدة دبال الرند (سيدنا موسى أو ورق الغار).
طريقة التحضير:
1. الصلق الأولي (سر التخلص من الغازات):
دير اللوبيا اللي فزكات ليلة كاملة وتغسلات في الكوكوت، اخوي عليها الما بارد الكافي، وخليها تغلي على العافية لمدة 10 حتى لـ 15 دقيقة. غادي تطلع واحد الرغوة بيضاء (هاديك هي الغازات). صفي اللوبيا في شبكة، واغسليها بالما دافئ وخليها على جنب. تخلصي من هاداك الما ديال الصليق تماماً.
2. الطياب النهائي:
في نفس الكوكوت (بعد ما تغسلها)، دير اللوبيا المصلوقة والمصفاة. زيد عليها: البصلة المحكوكة، الثومة، القزبور والمعدنوس، ومطيشة المحكوكة. ضيف العطرية: التحميرة، الكامون (معلقة صغيرة)، القزبور يابس، الخرقوم، سكنجبير، وورقة سيدنا موسى.
ملاحظة: (الملحة، مطيشة الحك، والحامض مصير خليهم حتى للأخير).
3. التمراق:
خوي الما طايب في الكوكوت حتى تتغطي اللوبيا وزايد عليها شوية ( الما البارد كيكززها ضروري يكون الما طايب). زيدي الزيت، غلقي الكوكوت وديري الصفارة، وخليها تطيب على عافية متوسطة لمدة 30 حتى ن 40 دقيقة (حتى تقرب تطيب مزيان).
4. اللمسة الأخيرة:
حلي الكوكوت، دابا عاد زيدي الملحة (حسب الذوق)، زيدي ربع حامضة مصيرة، ونصف معلقة صغيرة ديال مطيشة الحك (مذوبة في شوية ديال الما).خلي الكوكوت تغلي بلا غطاء على عافية مهيلة لمدة 10 دقائق حتى تلبى المرقة وتخثار. قبل ما تطفي العافية، رشي هاديك نصف معلقة صغيرة ديال الكامون اللي بقات، باش تبقى النسمة ديالو طرية وتطرد الغازات.
