المقادير :
العجين :
2 زلايف كبار معمرين بالطحين
8 معالق كبار ماء الزهر
كاس صغير وربع زبدة مدوبة ومصفية
30غ سكر سنيدة
قبصة ملح
شوية د الما بارد
الحشو :
كيلو د اللوز مصلوق ومقشر
زلافة كبيرة ونصف من السكر سنيدة
كاس زبدة مدوبة ومصفية
نصف كيس صغير مسكة بلدية مدقوقة
8 معالق كبار ماء الزهر
الطريقة :
خلطي اللوز مع السكر وطحنيهوم حتى يرطابو ويوليو بحال العجينة ، زيديلوم المسكة البلدية و الزبدة و ماء الزهر باش تحصلي على العقدة . ايلا ما تجمعلكشي العجين يمكنلك تزيدي ماء الزهر حتى يتجمع .دلكي العجين مزيان حتى يولي رطب عدليه على شكل اصابع صغيرة ، غادي يعطينا تقريبا شي 100 اصبع هاد المقدار .
من جهة اخرى ، خلطي الطحين بالملحة و السكر وزيدي الزبدة وخلطي مزيان ، فلركي الخليط بيدك باش يشرب الطحين ديك المادة الدسمة . زيدي ماء الزهر وشوية د الما الى ان تتجمع العجينة ودلكيها مزيان حتى تولي رطبة . عملي منا 6 د الكويرات خليها ترتاح شوية داخل كيس من البلاستيك .
طلقي الكويرة د العجينة فوق الطابلة حتى تولي رقيقة ومن الاحسن استعملي ديك الالة ديال توريق العجينة ، مدديها في الطول باش تحصلي على مستطيل عرضه 12 سنتمتر . خدي الاصابع اللي عدلنا وحدة بوحدة ، صففيها متباعدة فوق المستطيل وتخلي العجينة زايدة باش نقدرو نطويوها . المهم الطريقة راها معروفة باش كنطويو الكعيبات ديانا وكنقطعوهوم بالناعورة المسننة .
كنصففو الهلالات ديانا ف اللاطة ما نساوشي نتقبوهوم باليبرة ونخليوهوم يرتاحو مدة 12 ساعة . بعد ذلك عاودي تقبيه مرة اخرى باش ما كيتنفخشي ودخليه للفران مدة 5 دقايق وخرجيه ، دهنيه بابيض البيض وولي رجعيه للفران باش يطيب.
